المساعد الشخصي الرقمي

مشاهدة النسخة كاملة : أفضل ما قيل في ثورة 17 فبراير


علي طرابلس
10-02-2011, 04:46 PM
سوف نخصص هذه المساحة لسرد أفضل العبارات ( best of) التي قيلت في ثورة 17 فبراير

من وجهة نظر كل عضو في المنتدى.




* أن ليبيا رجعت إليكم بثمن غالي جدا.

العميد صفوت الزيات..
للقناة ليبيا أولاً



نعم الثمن كان غالي جدا فقد قدم الشعب الليبي قوافل من الشهداء والجرحى بالالف.

ولكن ليبيا تستحق كل ذلك.



* أنا لااستحق الحياة اذا كان شعبي لا يحبني.

الطاغية القذافي



نعم ان شعبك لا يحبك...ونعم انك لا تستحق الحياة.

(صدقك وهو كذوب)

سفيرة الهدرزه
10-02-2011, 05:42 PM
ليبيا تعاني ليبيا تموت ليبيا تنزف يالله يالله
هادى الكلمه اثرت فيا هلبا

علي طرابلس
10-02-2011, 06:08 PM
شكرا سفيرة ع المرورِ الطيب

نعم هذه الكلمات مؤثر جدا جدا...كلما اسمعها (لحمي يكشش وعيني تدمع)

انها بالفعل خرجت من القلب ووصلت اِلي القلب

ليبية وراسي عالي
10-02-2011, 06:34 PM
ليبيا تعاني ليبيا تموت ليبيا تنزف يالله يالله ......
ياكل من له ضمير حي طرابلس تصرخ وتناديكم وتخاطب فيكم النخوة والشهامة فهبو لنجدتها.....

فيروس الليل
10-03-2011, 03:56 AM
يا رب فك الشعب الليبي منه يا رب العالميين
و الله يا معمر القذافي ان نمسكك نقتلك قسما عظما ان نمسكك حتى ميت انطلعك من قبرك
مش زنقه زنقه ... حفره حفره

يوم تحرير مدينة اجدابيا للمره الثانيه

و شكرا خوي على هذا الموظوع الراقي
و عاشت ليبيا حره

عيونى ليبيا
10-03-2011, 04:08 AM
(اخ معمر اترك الليبيين فى شأنهم)طبعا هده مش الافضل افضل حاجة ليبيا تعانى ليبيا تموت

اسعى للهدى
10-03-2011, 04:37 AM
وين العالم وين وين المنظمات الدولية وين منظمات حقوق الإنسان

يجوا يشوفواالمجازر اللى صايرة فى ليبيا .

قالها أحد الشباب فى بداية الأحداث مش عارفة تذكروها ولا لا

بس أكيد أكثر شعار مؤثر هو :ليبيا تعانى ليبيا تموت يا الله يا الله

وكذلك يبو يحرقونا يبو يحرقونا ...

بارك الله فيك أخى الفاضل على هذا الموضوع الرائع

العور
10-03-2011, 04:56 AM
في كلمه قالها واحد بس مش ع التلفزيون قالها لما اصاب في اول يوم في الثورة

يا ناس ردوا بالكم اتضيعوا الي درناها خلكم يد وحده وبعدها مات

جريح القلب
10-03-2011, 05:58 AM
الولد الصغير الي قال خلاص يامعمر اطلع فديناا منك معاد نبوك

تحيـــــــــاتي ومنور ع الموضوع

libya free
10-03-2011, 06:08 AM
من افضل ماقيل في الثوره
قال محمد نبوس (انا مش خايف انموت انا خايف نخسرو المعركة)

والوليد المصاب بسرطان الدماغ ربي يرجعة للوطن سالم معافه(اطلع انت وعويلك وعيلتك زي الهزرع .......
سامحوني معش نذكر باقي ماقال

وولي عهد قطر الاميرتميم حمد آل ثاني (الشعب اللييبي لايتوسل ولا يسول )

شكرا خوي علي الموضوع دائما مواضيعك جميله
ربي يوفقك,,,,,,

المهندسة لولو
10-03-2011, 06:19 AM
يا رب فك الشعب الليبي منه يا رب العالميين
و الله يا معمر القذافي ان نمسكك نقتلك قسما عظما ان نمسكك حتى ميت انطلعك من قبرك
مش زنقه زنقه ... حفره حفره

يوم تحرير مدينة اجدابيا للمره الثانيه

و شكرا خوي على هذا الموظوع الراقي
و عاشت ليبيا حره

هادي هيا أكتر جمله أترت فيا (والراجل الي يبكي ويقول إنشاء الله تشوفه في عيالك يامعمر ) حتي هو في نفس يوم تحرير التاني لي إجدابيا وفيه تاني مانعرفش شوفتوه أو لا علي قناة الحره أتصال مع مصراتي يقولهم مصراته تموت مصراته أنتهت الزواية تدك الزاوية تغتصب أين الناتو أين العالم فليسرع لإيجاد حل هذا أبكاني كتيرا وليا عوده علي خاطر الموضوع حلو‎

بنوته بنغازية
10-03-2011, 08:38 AM
- القذافي زال انتهى انتهى القذافي
- حسبي الله ونعم الوكيل فيك يامعمر ان شاء الله تشوف عيالك هكي ان شاء الله
- وين حقوق الانسان وين المنظمات الدولية - وين العالم وين
- ليبيا تعاني ليبيا تموت ليبيا تنزف يالله يالله
- ياكل شباب ليبيا يامن لديه ضمير حي طرابلس تصرخ وتناديكم وتخاطب فيكم النخوة والشهامة فهبو لنجدتها
- شوفو معمر ايش ايدير حارق خارق ياهوو اليهود ماداروشي اسرائيل ماداروشي

علي طرابلس
10-03-2011, 04:15 PM
شكرا جزيلا لكم ع المرور الطيب & ع المشاركات الرائعة

علي طرابلس
10-03-2011, 04:18 PM
*ليش يا معمر.....احنا كنا نقوللك يا بابا معمر؟!

في اب يقتل صغاره؟؟؟!!...ليش خلتنا نجيبو العالم بش يحمينا منك

حسبي الله ونعم والوكيل فيك.

طفل من مصراتة

علي طرابلس
10-03-2011, 04:26 PM
Problem has a name is Gaddafi .... he must leave.


*المشكلة لها أسم هو القذافي....يجب عليه الرحيل.

خوسيه باروسو البريغالي
رئيس المفوضية الأوروبية



في بداية الاحداث و بينما كان القدافي يقتل شعبه بوحشية

كان القدافي وفي نفس الوقت يتوسل للغرب بطريقة مخزية

بعبارات: ياابني اوباما ....وياصديقي برلسكوني.. ويا صديقى ساركوزي

وكان يغريهم بالنفط والاسثمتار الغير مشروط....وكان يحدرهم من ان غيابه

يعنى خطر على المنطقة وعلى العالم..وبالفزعة القاعدة..


ولكن الرد كان حاسماً والرسالة واضحة من قبل كبار رؤساء الغرب:

Gaddafi has lost its legitimacy, has to go immediately

القدافي فقد شرعيته وعليه الرحيل فوراً..الان.

اعتقد ان هذا الكلام وقعه وتأثيره على القدافي كان اشد من قنابل وصورايخ الناتو.

الحمد الله الذى سخر للشعب الليبي من يساعده في قصم طهر القدافي.

ميمي92
10-03-2011, 05:10 PM
يبيا تعاني ليبيا تموت ليبيا تنزف يالله يالله ......
ياكل من له ضمير حي طرابلس تصرخ وتناديكم وتخاطب فيكم النخوة والشهامة فهبو لنجدتها.....

ياناس كل العبارات يلي قلتوها اثرت فيا والله لعند توا
بس هذي اكثر وحده حتى امتاع
يبو يحرقونا يا كلاب " وااااااااااااااااااااااك هذي قالتها المراه في بنغازي خلتنا نبكو "

ميمي92
10-03-2011, 05:13 PM
بكيت شلقم خلتنا نبكو كلنا وكانت ابلغ من اي عباره
عايش هوا واعياله وامخلي الشعب فقير المرأه من بنغازي قالتها

فيروس الليل
10-03-2011, 06:50 PM
سوف نبقى هناء .. كي يزول الالم .. سوف نحي هناء .. سوف يحلو النغم

جماهير شباب بنغازي تحت المحكمه في أول قناه تدخل مدينة بنغازي و هي قناة السي أن أن

عاشت ليبيا حره

c4-G
10-04-2011, 12:18 AM
الولد الصغير الي قال خلاص يامعمر اطلع فديناا منك معاد نبوك

تحيـــــــــاتي ومنور ع الموضوع

يمعمر خطنا ... تفتفت كيف هزرع منذكرش باقي الكلام
والله مفروض يسموه حكيم الثوره لانه لخص الموضوع كله

علي طرابلس
10-04-2011, 11:48 AM
في بداية الاحدات (وسبب هذا الاحداث)

توجه مجموعات من اهالي سجن بوسليم في مدنية بنغازي الحبيبة


توجهوا الي مقر احتجاز المحامي فتحي تربل- محامي اسر السجناء-

للمطالبة بالافراج عليه..وكان في مقر الاحتجاز عبد الله السنوسي

وعندما عالت الاصوات و المطالب خارج المقر طالب فتحى تربل من عبد الله السنوسي

ان يخرج للاهالي لكي يقوم بتهديتئهم والتفاهم معهم....فقال له الجلاد عبدالله السنوسي

....اتريد ان اصنع منك بطلاً........

ياسبحان الله يمكرون يمكر الله والله خير الماكرين

السنوسي خاف ان يكون هناك بطل واحد...ويشاء الله ان يكون اهالي بنغازي كلهم ابطال

ومن تم تنفض ليبيا بكاملها لتصنع ملحمة شارك فيها كل ليبيا رجال ونساء وحتى الاطفال.

واصبحوا كلهم ابطال ... وتبت للجميع ان

الشعب الليبي في القمة

كلنا يعرف اسم قائل هذا العبارة المشهورة...ولكن وللآسف لازال مكانه غير معروف .

عبادي بورزيزه
10-04-2011, 06:06 PM
في شايب مريض من مسه مشهور باسم حسين فرنش قالوله القدادفي يبي يخش للاجدابيا وبياخد بنغازي والمنطقة الشرقية
قاللهم والله مايقدر تراب حامي هدا

ملك الخواتم
10-04-2011, 06:11 PM
الجنـــــــــــــه والزنتـــــــــــــان لن تدخلــــــــــــــــــــــــــهم يا قـــــــــــــــــدافي

علي طرابلس
10-06-2011, 11:06 AM
مطلبنا هو الحرية فقط

احد ثوار ليبيا


نعم...فقط لخص هذا البطل مطلب الشعب الليبي بكامله

وقال للعالم سبب خروجه على الطاغية في ثورة 17 فبراير

علي طرابلس
10-15-2011, 11:51 AM
لم تحدث أي مظاهرات في ليبيا على الاطلاق
الطاغية القدافي


هذا الرجل يكدب ما يراه الناس باعينهم
عوض الفيتوري

sam_ly
10-15-2011, 04:26 PM
قال محمد نبوس (انا مش خايف انموت انا خايف نخسرو المعركة)

علي طرابلس
10-16-2011, 04:23 PM
ثورة 17 فبراير الليبية انطلقت نتيجة لعدة اسباب

الخارجية منها والتى ساعدت على تسرعيها

هي ثورة تونس التى انطلقت من الجنوب التونسي

على يد محمد البوعزيزي

وافضل ماقيل عن هذا الشاب:

The man who could change everything

الرجل الذي استطاع تغير كل شي

مرسلة بي بي سي


السؤال هل غير كل شي في تونس او في شمال افريقيا او .....

علي طرابلس
10-21-2011, 12:11 AM
يوم مقتل القدافي....يعتبر يوم من أيام الله


القدافي قتل الليبين طلما والليبين قتلوه قصاصاُ

شلقم
لقناة الاحرار

هبو الحلوه
10-21-2011, 01:02 AM
( هذه معركه بين السلطه والشعب سينتصر فيها الشعب شئنا اما ابينا)

كانت من احدي المعارضين ع قناة العربيه

(درق زومتك معاش نبوك درق زومتك شن بنغازي بلادك باتك ياساعدي)

وهادي من احدي ثوار درنه اسمه عامر سعد في اول جمعه في الثوره بأتصال لقناة الجزيره


مشكور ع الموضوع الرائـــــــــــع


تحياتي

نادر كارا
10-21-2011, 02:11 PM
وقد اشار وبكل وضوح ان المرتزقة الافارقة الدي اشتراهم بالمال سايعتون في الارض فاسد

قالها الدباشي


واحلي كلمة طبعا كلمة شلقم

يوم قلهم

يحتاجون جبال من حبوب الهلوسة

وقال معمر ضاقت بيه الارض بما رحبت

علي طرابلس
10-21-2011, 06:36 PM
هبوة الحلوة & نادر كار

مشكورين ع المشاركة

علي طرابلس
10-28-2011, 09:40 PM
الثورة التونسية فجاءت العالم .....والثورة المصرية ساندها العالم

والثورة اليمنية نساها العالم .....والثورة السورية عارضها العالم

والثورة الليبية ادهلت العالم

فيروس الليل
10-29-2011, 03:09 AM
الثورة التونسية فجاءت العالم .....والثورة المصرية ساندها العالم

والثورة اليمنية نساها العالم .....والثورة السورية عارضها العالم

والثورة الليبية ادهلت العالم


فعلا خوي صحيح ما قلته العالم لا يريد ثوره في سوريه و لكن الله معهم
و ثورتنا غير
شكرا ليك

بنغازى شراره
10-29-2011, 08:35 AM
الوليه اللى كانت تجى فى قناة الشبابيه لبسه جرد بودرى
تقول ركبتنى الرعشه يا حبيبتى

تورنيدو
10-29-2011, 12:06 PM
افضل ماقيل فى هذه الثورةالمباركة والذى سخر من الله لنجدة الشعب الليبى كانت كلمات عبدالرحمن شلقم والتى اتت فى عدم وثوق الليبيين من موقفه فعندما قال هؤلاء الناس يحتاجون الى جبال من حبوب الهلوسة والكلمة الاخرى التى انتفض بها العالم لنجدة ليبيا وهو ايضا من تساخير الله وان هذا الرجل اصبح كرت محروق معمر يقول للشعب الليبى اما ان احكمكم انا واولادى واما ان اقتلكم جميعا كانت هيا القشة التى قسمت ظهر البعير والا كنا فى خبر كان الله اكبر ولله الحمد

علي طرابلس
10-29-2011, 07:47 PM
شكرا لكم ع المشاركة

علي طرابلس
11-10-2011, 04:31 PM
الثورة يفكر بها الفلاسفة....وينفدها الابطال

ويستفيد منها الجبناء

ثائرة ليبية
11-12-2011, 05:35 AM
أحسن ماقال الطاغية (أني قاعد هنا).....وباهي ألي قعد زينك قعدة هوا دارها تحدي بس جت علي راسه.....

جوهرة طرابلس
11-12-2011, 04:08 PM
ليبيا تعاني ليبيا تموت ليبيا تنزف يالله يالله...

هذه من أكثر الكلمات اللي أثرت فيا هلبا

شكرا ليك على المواضيع المميزة والرائعة...

علي طرابلس
11-12-2011, 09:27 PM
شكرا لكم ع الرودد الرائعة والمميزة

نسيمالهوي
11-12-2011, 09:49 PM
مساؤك طيب
علي طرابلس
حبيت انشارك في الموضوع
موضوعك حلووو ومميز جدا
مشكووور عليه
فيه كلاااام بنت صغيرة قالته
في قناة الان شفتها
تقول
((احنا شني درنالك يا معمر
تقتل فينا .......))
وبعدين بديت تبكي
علي ما اعتقد هي من جدابيا كانت
والله بجد أثرت فيا هلبة

تقبل مني التحية
نسيمالهوي

علي طرابلس
11-12-2011, 09:57 PM
نسيمالهوى

مساءك طيب

اسعدنى توجدك و تعليقك

نعم اصعب شي في الحياة دموع طفل

كما ان احلى شي في الحياة هو ابتسامة طفل

تحياتي

نـحـول
11-12-2011, 10:31 PM
شي واجد اثر فيا
مصراته وين طلعت قالت ثوري ثوري يا مصراته بنغازي تطلب في اغاته
الشرق و جبل نفوسا بروح بدم نفديك يا مصراته
المدن المحرره قالو ياشباب الزاويه نبو ليله ضاويه
المدن المحرره ياشباب العاصمه نبو اليله حاسيمه
ياقدافي موت موت مصراته وزنتان خوت

ونحن نمشي على شفرات السيوف ونأتي المنية من أبوابها نحـــن رجال لــنا تاريــــخ ولنـــا مجــد تاريــخ مسطر بالــدم
مصراته دونها الــدم مصـراته معـــجزه من معجــــزات العــــــــمل العـســــكرى
ابـــــــداع فى التــــوره ابـــداع فى المــقاومه ابـــداع فى العطاء ابداع فى الدفـــــــاع
ابــداع فـــى الاستــــماته شاهدت واستـــمعت بــام عيـــنى واقــسم بالله العضـــيم اقســم بالله العضـــيم
ماشـــفته اللى شـــفته فى مصــــراته انها ملـــحمة التاريخ والعضـــمه والمــــــجد

كوكب زمرده
11-15-2011, 06:48 PM
هؤلاء يحتاجون جبال من حبوب الهلوسه ليفقدوا عقولهم

كلمه شلقم من افضل ما قيل

وهذي اخرتها يا اهل بنغازي (مش عارفه شنو كان يرجي منا بالضبط )*5

علي طرابلس
11-15-2011, 07:42 PM
شكرا لكم ع المشاركة

علي طرابلس
11-25-2011, 12:17 AM
لا اريد منصب ولاقيادة...فقط أريد ان اكون جندي

واحطى بشرف المشاركة بثورة 17 فبراير


اللواء عبد الفتاح يونس
بعد ان تصارع الاقزام ع المناصب

الميرنغي
11-25-2011, 08:37 PM
شن درنالهم ياحبيبتي شن درنالهم ههههههه اقوي وحده

مرح بنت ليبيا
11-25-2011, 09:02 PM
libya free

علي طرابلس
01-06-2012, 12:24 AM
شكرا لكم ع المشاركة والتفاعل مع الموضوع الهام

والحمد لله الذي ساعدنا في توثيق اهم وافضل ما قيل في ثورة 17 فبراير

وهي محاولة بسيطة لتوتيق كل مايتعلق بثورة ليبيا والليبين

علي طرابلس
02-12-2012, 07:41 PM
libya free

Libya free

أبكاني الزمن
02-13-2012, 08:52 PM
في هلبه حاجات ملاح لاكن أكثر شي في ميدان شهداء في طرابلس 20 فبراير لما قعدو يهتفو بالروح بالدم نفديك يا بنغازي الله كلمات هزت حياتي وبكتني هلبه مع الصوره طبعا مش صوت بس

علي طرابلس
02-14-2012, 10:19 AM
في هلبه حاجات ملاح لاكن أكثر شي في ميدان شهداء في طرابلس 20 فبراير لما قعدو يهتفو بالروح بالدم نفديك يا بنغازي الله كلمات هزت حياتي وبكتني هلبه مع الصوره طبعا مش صوت بس

بالروح بالدم نفديك يا بنغازي

علي طرابلس
04-26-2012, 07:36 PM
أين كان أباءكم؟

كلمة قالها شاب ليبي عمره 18 عاما لاخيه في الجبهة
بالفعل اين كان اباء هؤلاء الشباب الصغار الذين صنعوا
المعجزة واطاحوا بالطاغية

هل كانوا يلهتون وراء لقمة العيش

وعد روبي
04-26-2012, 07:51 PM
ليبيا حرة والله حاميها

وعد روبي
04-26-2012, 07:56 PM
*ليش يا معمر.....احنا كنا نقوللك يا بابا معمر؟!

في اب يقتل صغاره؟؟؟!!...ليش خلتنا نجيبو العالم بش يحمينا منك

حسبي الله ونعم والوكيل فيك.

طفل من مصراتة
من بعد ماعقلت مانطقتش كلمة بابا معمر
بس انقولك ماكانش في داعي نستعينو بحد اليبيين قدها وقدود يقدرو يحمو بلادهم بنفسهم

درناوى اصيل
04-26-2012, 08:48 PM
بروح بالدم نفديك يا بنغازىليبيا حره
الله اكبر ولله الحمد
تقبل مرورى مع تحياتى ،،،،،،

علي طرابلس
04-30-2012, 07:18 PM
الجنرال (دان عامون) الباحث والمعلق الاستراتيجي الاسرائيلي :

ان ثوار ليبيا اظهروا براعة وقوة في القتال لاتضاهى
وانهم كانوا ينمون قدراتهم التخطيطية والقتالية كل يوم .

وعندما ذكرته مراسلة إذاعة الجيش الاسرائيلي بأنه يتحدث عن عدو لإسرائيل

قال: على الشعب الإسرائيلي ان يشكر الرب ان جعل هؤلاء بعيدين عنا.....

كردون
05-04-2012, 02:59 AM
الثورة يفكر بها الفلاسفة....وينفدها الابطال

ويستفيد منها الجبناء

الثورة يبدها الشهيد ........ ويكملها المناضل

ويستقيد منها الجبان

كل الكلام والمقولات قيلت فى ثورة 17 فبراير كانت مؤثرة وبالذات الانسانية المراقفة لتضحية ..

اما بالنسبة ليا انا كنت دئمآ اركز على تصريحات العالم الخارجى ..

والتصريح الذى اعجبنى تصريح هيلاري كلينتون عندما خرجت فى تصريح وقالت ..

القذافى يقيس فى صبرنا ونحن صبرنا طويل ..

المشكلة تنتظر برنامج حمزة التوهامى او شاكير او هالة ويفوتك تصريح هيلارى كلينتون وديفيد كاميرون وتحليل صفوت الزيات ...
شكرآ خوى علي على الموضوع الرائع .. حبيت انفعله بمشاركتى ..

سيف العرب
05-04-2012, 02:25 PM
انى معى الله ومعى الملايين الدى نصرنى على القوة العظمى..........لالالالالالاه شنو درنالهم يا حبيبتى رعشونا............... انقووووله ارفع خشمك لفوق ما توطيش خشمك ........من انتم...........دقت ساعة العمل.........لا رجوع الى الامام............ هههههههههههههههه فى حد يترك بلاده .......واعظم الجمل اللى سمعتها شنو دوة المراهقين...... جروحى اوسمة.........................عبد الفتاح يونس عيونى اغلى من ولدى محمد مصيره مجهول

بنت تاجوراء الحرة3
05-04-2012, 08:20 PM
انى معى الله ومعى الملايين الدى نصرنى على القوة العظمى..........لالالالالالاه شنو درنالهم يا حبيبتى رعشونا............... انقووووله ارفع خشمك لفوق ما توطيش خشمك ........من انتم...........دقت ساعة العمل.........لا رجوع الى الامام............ هههههههههههههههه فى حد يترك بلاده .......واعظم الجمل اللى سمعتها شنو دوة المراهقين...... جروحى اوسمة.........................عبد الفتاح يونس عيونى اغلى من ولدى محمد مصيره مجهول

هذا اجمل ما عاجبك؟

التوب الابيض
05-04-2012, 11:54 PM
1 - الشهيد العميد علي حدوث العبيدي عند وصوله مصراتة : [ نحن نمشي على شفرات السيوف ونأتي المنية من أبوابها , نحنا رجال لنا تاريخ ولنا مجد ]
أخبرهم يا علي .. أننا لا نخاف إلا من الله العلي
الرجال مواقف , وعلي لم يقل محاصر وعلي ضغوط وخائف على عائلتي ! وغيرها من الاعذاار الواهية

2 – الشهيد العميد علي حدوث العبيدي [ شرف الشهادة , ابحثوا عن الشهادة ما تبحثوش على 500 جنيه في كتيب عائلة , ما تبيعوش أنفسكم بالمال ]

أراد ان يفهمهم مقام الدنيا من الآخرة بالأقوال فلم يفهموا
فشرحها لهم بالأفعال فلم يفهموا الا قليلا منهم ( وما أنت بهادي العمي عن ضلالتهم )
رحمك الله يا رمز البطولة والرجولة

3 - أم الشهيد عماد زكري من داخل مستشفى نالوت وهي تودع ابنها الشهيد [ اللهم اجعلني صابرة , الله اكبر عليك يا ولدي , اللهم اجعله من اصحاب الجنة , الله اكبر فلّاك أطاروانو ] كلمات بسيطة ممزوجة بصبر كبير وزغروتة على عريس الجنة رحمه الله وكل شهداء ليبيا

4 - الرجل على الدبابة حين قال [ نحنا قضيتنا الحرية بس ]
ليت من يتشذقون بالحرب الأهلية يفهمون كلامك

لم ينتصر في حربنا ليبي على ليبي بل انتصر الحق على الباطل والحرية على العبودية
ولو كانت الوحدة بالعبودية والباطل لما ارسل الله موسى عليه السلام وغيره من انبياء يقول في كل منهم أنه ارسله ( الى قومه ) أي قوم واحدا ثم ( فمنهم من آمن ومنهم من كفر ) فتفرقوا !

5 - الطفل الصغير المصاب بالسرطان [ أنا نقول لمعمر يتفتفت كيف الزرع ويخطانا ... يخطانا معاش نبوه ... يعدى هو وعيلته وعياله ] ما ابلغك من صبي ,شفاك الله وعافاك

6 - الشيخ الطاهر جديع من الزنتان مستهزءا من القذافي [ بل هو دجاجة نعم دجاجة بوفلفلة
جيب ملف جيب ملف قالك ليبيا الغد ليبيا الغد , يعطيه غدة تغده ]
عبر عن واقع عشناه باسلوب بسيط وسخرية واقعية من حال القذافي

7 - زقروبا من مدينة الزاوية يحكي المعاناة بروح كوميدية [ بالله قداش حاكمنا ؟ تي والله بدينا نغلطو , اطلع يا راجل سادك , والله يا معمر لو كاني في مكانك لما نمنع , ] هم يضحك , وهم يبكي , روح الدعابة قوية جدا في هذا الرجل , والحمد لله على رجوعه سالما

8 – الشاب الثائر من مدينة اجدابيا [ والله يا معمر لو يدفنوك لما نطلعك من قبرك مش زنقة زنقة , حفرة حفرة ] كلمات عبرت عن معاناة اهالي اجدابيا الابطال بعد اجتياحهم من كتائب المقبور واصرارهم على الانتصار بعد الانكسار

9 - الشيخ ابراهيم هزاوي من البيضاء [ اتركو ثقافة الهتاف المقيتة , خلونا نتعلموا ثقافة الحوار والاستماع الى بعضنا , نحن من يصنع الطغاة بالهتاف ] كلمات رائعة من شيج جليل ليتنا نفهمها ونحفظها ونطبقها .. اتركوا ثقافة الهتاف

10 - الأم العجوز التي تدعوا من قلبها [ ندعي ربي سبحانه انه يصبرهم وينجيهم ] بوركت يا امنا منكن رضع ابطالنا العزيمة والشجاعة والجهاد

هذه كانت من ابلغ الكلمات وهناك غيرها كثير من الكلمات التي أثرت فينا أثناء الثورة الليبية

هذه كانت من ابلغ الكلمات وهناك غيرها كثير من الكلمات التي أثرت فينا أثناء الثورة الليبية
ويلاحظ انهم جميعا لم يمسكوا ورقة ولا وقفوا على منصة عالية ! ولا اعطوا مناصب ولا قدم لهم ولا لبسو بدلات راقية
لكن ما خرج من القلب يصل الى القلب بسرعه...

علي طرابلس
05-06-2012, 06:31 AM
مثقف سعودي:

الثورة الليبية تختلف على جميع الثورات

كيف؟

كل ثوار الربيع العربي يقولون لزعمائهم..ارحل الا انتم..

قلتوا له ابقى جيينك جيينك................................

علي طرابلس
06-09-2012, 07:40 PM
ليبيا حرة والله حاميها

نعم ..عاشت ليبيا حرة
وربي حاميها

علي طرابلس
06-10-2012, 07:24 PM
انى معى الله ومعى الملايين الدى نصرنى على القوة العظمى..........لالالالالالاه شنو درنالهم يا حبيبتى رعشونا............... انقووووله ارفع خشمك لفوق ما توطيش خشمك ........من انتم...........دقت ساعة العمل.........لا رجوع الى الامام............ هههههههههههههههه فى حد يترك بلاده .......واعظم الجمل اللى سمعتها شنو دوة المراهقين...... جروحى اوسمة.........................عبد الفتاح يونس عيونى اغلى من ولدى محمد مصيره مجهول

شكرا

عسل البيضاء
06-10-2012, 07:39 PM
الكلمة هذى قالها أحد الشهداء قبل ما يستشهد

<ما تسيبوش الثورة يا جماعة>

الله يرحمة ويرحم جميع شهدائنا

علي طرابلس
06-10-2012, 10:08 PM
الكلمة هذى قالها أحد الشهداء قبل ما يستشهد

<ما تسيبوش الثورة يا جماعة>

الله يرحمة ويرحم جميع شهدائنا

الله يرحمه ويرحم جميع شهداء ليبيا
اعتقد هذه الكلمة للشهيد اليمنى من البيضاء

مشكورة احتى ع المشاركة

علي طرابلس
06-14-2012, 07:06 AM
عزمي بشارة" على قناة الجزيرة اليوم :

الحالة الليبية أصعب حالة من بين حالة تونس ومصر واليمن

نظراً لأن النظام السابق دمر الدولة وكانت الدولة عبارة عن كتائب ولجان ثورية ولائها له ،

لكن الشعب الليبي شعب (شرس) ويجب أن نحييه لأنهُ أسقط نظام قمعي... وأمني من الدرجة الأولى


ولكن لهذا الشعب تحدي كبير جداً وهُو إقامة النصر الحقيقي

وأنا قلتها من بداية الثورة أن الحسم الحقيقي

هُو سيكون للإنتصار الأكبر وهو إقامة الدولة والقانون


ونعلم جيداً أن الشعب الليبي رغم كثافة السلاحة تجد الهدوء والتقدم

نحو إنشاء معالم واضحة للدولة ،

فيجب علينا أن نقف إجلالاً وتحية ً لهذا الشعب العظيم .


أريد أن أقول أيضاً أن الفيدرالية حل غير مناسب

وأنا ضد الفدرالية في ليبيا ومع توحيد الوطن الليبي والقضاء على المركزية

ويجب على الليبيين أن يبدلوا الكثير للإبقاء على وحدة هذا الوطن

فلا أعتقد أنهم سيتركونه يتجزأ في أبان الثورة وأيام الحرب ليتجزأ الآن .

علي طرابلس
07-15-2012, 06:42 PM
"اذا حكمت ليبيا لن اسمح لك بزيارتها طول فترة رئاستي"

محمود جبريل لجكوب زوما رئيس جنوب افريقيا
عندما اصر زوما على بقاء القدافي في ليبيا
في اي حل سياسي اتناء حرب التحرير.

فتـى~بنغ ــآزي
07-16-2012, 01:28 AM
نوضـي نوضــي يابنغــآزي .. جـاك اليـوم لـي فيـه اتراجــي


الزنتان
بنغازي مانكش بروحك .. نحن ضمادين جروحك
البيضا
نوضي نوضي يابنغازي .. مـ البيضا جيناك كوازي
الزاوية
بالروح بالدم نفديك يابنغازي .
سوق الجمعه
وين تريس سوق الجمعة .. بنغازى تبكى بالدمعه .
فشلوم
فشلوم معاش تخافي .. خوتك ماتو في بنغازي
مصرآته
ثوري ثوري يامصراته .. بنغازى تطلب اغاثة .
ورفله
ورفلة هي ورفلة .. عن بنغازى ماتخلي

علي طرابلس
07-16-2012, 11:31 AM
نوضـي نوضــي يابنغــآزي .. جـاك اليـوم لـي فيـه اتراجــي


الزنتان
بنغازي مانكش بروحك .. نحن ضمادين جروحك
البيضا
نوضي نوضي يابنغازي .. مـ البيضا جيناك كوازي
الزاوية
بالروح بالدم نفديك يابنغازي .
سوق الجمعه
وين تريس سوق الجمعة .. بنغازى تبكى بالدمعه .
فشلوم
فشلوم معاش تخافي .. خوتك ماتو في بنغازي
مصرآته
ثوري ثوري يامصراته .. بنغازى تطلب اغاثة .
ورفله
ورفلة هي ورفلة .. عن بنغازى ماتخلي

شكرا اخي ع المشاركة القيمة

علي طرابلس
09-01-2012, 05:55 PM
دقت ساعة العمل ...17.2.2011
دقت ساعة الزحف....20.8.2011
دقت ساعة الانتصار.... 20.10.2011
لا رجوع الي....1969

عبارة كتبت على الحائط في منطقة سوق الجمعة طرابلس